ޓީމެއްގެ ގޮތުގައި މަސައްކަތް ކުރުމުގެ މުހިންމުކަން

ލިޔުނީ: އަޙްމަދު މުޙައްމަދު، ސީނިއަރ ކަރިކިއުލަމް ޑިވެލޮޕްމަންޓް އެނަލިސްޓް، އެން.އައި.އީ

• ދިރާސާތަކުން އެނގޭގޮތުގައި، ގުޅިގެން މައްސަލައެއް ޙައްލުކުރުމަށް މަސައްކަތްކޮށްފިނަމަ މާބޮޑަށްވެސް ނަތީޖާ ރަނގަޅެވެ.
• އެކަކު އަނެކެއްގެ އެހީތެރިކަމާއެކު މަސައްކަތްކުރާނަމަ ކުރިމަތިވެދާނެ ގޮންޖެހުންތަކާ ކުރިމަތިލުމަށް ފަސްނުޖެހި އާޚިޔާލުތަކާއި ގޮތްތައް ހޯދުމަށް ޝައުގުވެރިވެއެވެ.
• ޓީމެއްގެ ގޮތުގައި މަސައްކަތްކުރުމުން އަމިއްލައަށް ކުރިއަށް ދިއުމަށް ހިތްވަރުލިބި، މަސައްކަތުން ލިބޭ ހިތްހަމަޖެހުން އިތުރުވެދެއެވެ. އަދި ކަންބޮޑުވުންތައް ދުރުކޮށްދެއެވެ.

ބަހާލައިގެން ޓީމެއްގެ ގޮތުގައި މަސައްކަތް ކުރުމަކީ ކުރިއަށް ދިއުމަށް އޮތް ހުރަހެއްކަމަށް ދެކޭނަމަ އަވަހަށް އެޚިޔާލު ދޫކޮށްލާށެވެ. ހަގީގަތަކީ، ޓީމެއްގެ ގޮތުގައި މަސައްކަތް ކުރުމަކީ، ކުރިއަށް ދިއުމަށް އެއަށްވުރެ މުހިންމު ކަމެއް ނެތްކަމަށް ގަބޫލުކުރުމެވެ.

ޓީމެއްގެ ގޮތުގައި މަސައްކަތް ކުރުމުގެ ސަބަބުން ލިބޭ ކުރިއެރުންތަކާ ގުޅޭގޮތުން މެނޭޖްމަންޓް ކޮންސަލްޓެއް ކަމުގައިވާ ޖޯން . ޖޭ. މަރފީ (1988) ލިއުއްވާފައިވާ ގޮތުގައި ކޮންމެ އިންސާނަކީވެސް ޚާއްޞަ ހުނަރުތަކެއް  ލިބިފައިވާ މީހެކެވެ. އެހެންކަމުން އެހުރިހާ ހުނަރުތަކެއް އެއްތަންކޮށް އެއް މަޤްޞަދެއް ޙާޞިލްކުރުމަށް އަމާޒުހިފައިފިނަމަ، އެއީ ކުންފުންޏެއް ނުވަތަ  މުއައްސަސާއެއް ވިޔަސް ހިންގުމަށް ލިބޭނެ އެންމެ ބޮޑު އެހީއެވެ.”

ރަނގަޅަށް ޓީމެއްގެ ގޮތުގައި މަސައްކަތް ކުރެއްވިއްޖެނަމަ މުއައްސަސާއެއް ހިންގުމުގައި ލިބޭނެ ފައިދާތަކެއް ތިރީގައި ހިމަނާލެވޭތޯ ބަލާނަމެވެ.

ޓީމެއްގެ ގޮތުގައި މަސައްކަތްކުރުމުން މައްސަލަތައް ހައްލުކުރަން ފަސޭހަވެއެވެ. މައްސަލައެއް ޙައްލުކުރުމަށް އޮތް އެންމެ މުހިންމު ކަމަކީ ޚިޔާލު ހޯދުމާއި މަޝްވަރާކުރުމެވެ. އެގޮތުން އެކުގައި މަސައްކަތްކުރާ އެންމެންގެ  މަޝްވަރާއާއި ލަފާ މައްސަލަ ހައްލުކުރުމުގައި ހޯދާށެވެ.

މާރފީ ދެކިލައްވާ ގޮތުގައި ކޮންމެ އާދަޔާ ޚިލާފު ސިކުނޑިއެއްގެ ފަހަތުގައި ޓީމެއް ވެއެވެ. ޓީމުގައި ހިމެނޭ އެކަކު އަނެކެއްގެ ހުނަރުތަކާއި މަޢުލޫމާތުގެ ބޭނުން ހިފައިގެން ހައްލުތައް ހޯދައި މަގްޞަދު ޙާޞިލުކުރުމުގައި އެ ސިކުނޑިން އަމަލީސިފަ ޖައްސުވައެވެ. ސައިންސްއިން ފެންނަންހުރި ހެކިތަކަށް ބަލާއިރު އެއް ސިކުނޑިއަށްވުރެ ގިނަ ސިކުނޑިތަކެއް އެކުވުމުން ނިކުންނަ ޖަތީޖާ މާރަނގަޅެވެ.

ލިބިދެވޭ މަޢުލޫމާތުން އެކި މީހުން ކަންކަން ހައްލުކުރަން ކުރިމަތިލާގޮތް ތަފާތެވެ. އެއްބަޔަކު ލިބޭ މައުލޫމާތުން ސީދާ މައްސަލަ ހައްލުކުރުމަށް އެނބުރޭއިރު އަނެއް ބަޔަކު އިސްކަންދޭނީ އިތުރު ޚިޔާލުތަކާއި މަޝްވަރާ ހޯދައިގެން މައްސަލަ ޙައްލުކުރެވޭނެ ގޮތެއް ހޯދުމަށެވެ.

ޓީމެއްގެ ގޮތުގައި މަސައްކަތްކުރުމުން އާކަންތައްތަކަކާއި އާގޮތްތައް ދަސްވެއެވެ. ގިނަމީހުން ގަބޫލުކުރާގޮތުގައި ކާމިޔާބު ހޯދެނީ ތިމާގެ ވަށައިގެންވާ ކަންތައްތަކުގެ ސަބަބުން އެހެން މީހުން ތިމާދެކެ ގަޔާވާތީއެވެ. އެހެން ނަމަވެސް ހަގީގަތަކީ، ކާމިޔާބު ލިބުން ބިނާވެފައި އިންނަނީ ތިމާއަށް ދަސްވާ އާކަމަކުން އަރައިގަތުމަށް ކުރަންޖެހޭ ބުރަ މަސައްކަތްތަކުގެ މައްޗަށެވެ. އަދި އެކަމެއް ތަރައްޤީކުރަން ކެނޑިނޭޅި މަސައްކަތް ކުރުމުން ކުރިއަށްޖެހޭ ޖެހުމެވެ. ތަޖުރިބާ އާއި ޚިޔާލުތަކާއި ގޮތްތައް ލިބިގަނެވޭނީ ތަރައްޤީކުރަން ކުރާ މަސައްކަތްތަކުންނެވެ. ގިނަބައެއްގެ މިކަންކަން އެކުވުމަކީ ކާމިޔާބު ހޯދުމުގައި ކުންފުންޏަށް އަވަސް ކުރިއެރުމެއް ލިބޭނެ ކަމެއްކަން ޔަގީނެވެ.

ޓީމެއްގެގޮތުގައި މަސައްކަތްކުރުމީ މުވައްޒަފުން ހިތްހަމަޖެހޭ އުފާވާކަމެކެވެ. ހެދިފައިވާ ދިރާސާތަކުން ފެންނަން ހުރިގޮތުގައި، މުވައްޒަފުންނަށް ހިތްވަރުދީ އިޙްތިރާމުކޮށް ތެދުވެރިކަމާއެކު މަޢުލޫމާތު ފޯރުވައިދިނުމުން ކުންފުނީގައި މަސައްކަތްކުރަން  ބޭނުންވާ އަދި ވަޒީފާގައި ދެމިތިބެން ބޭނުންވާ މިންވަރު އިންތިހާއަށް މައްޗެވެ. ހަމައެހެންމެ މުވައްޒަފުންނަށް އުފާވެރިކަން ލިބޭގޮތަށް ކުންފުނީގެ ކަންތައް ބައްޓަންކުރުމުން ކުންފުންޏަށް ލިބޭ ކުރިއެރުމާއި ފައިދާ ވަކިން ކުޑައެއްނޫނެވެ.

އިނގިރޭސިވިލާތުގެ ވޮރިކް ޔުނިވަރސިޓީން އިންޑަސްޓްރީތަކުގައި މަސައްކަތްކުރާ 1000މުވައްޒަފުންގެ މަޢުލޫމާތު ހޯދައިގެން ހަދާފައިވާ ދިރާސާއެއް ބުނާގޮތުގައި އުފަލުގައި ތިބެގެން މަސައްކަތްކުރާ މުވައްޒަފުންގެ މަސައްކަތް، އެހާލުގައި ނެތި މަސައްކަތްކުރާ މުވައްޒަފުންނާ އަޅާބަލާއިރު %20 ޕަސެންޓް އިތުރެވެ. އެހެންވީމާ، މުވައްޒަފުން ހިތްހަމަޖައްސައިދީ އުފަލުގައި ބައިތިއްބައިގެން މަސައްކަތް ނުކުރުވާނީ ކާކުހެއްޔެވެ.؟

ޓީމެއްގެ ގޮތުގައި މަސައްކަތްކުރުމުން އަމިއްލަ ނަފްސު ކުރިއަރައިދެއެވެ. ޓީމެއްގެ ތެރޭގައި މަސައްކަތް ކުރުމުން އަމިއްލަ ނަފްސު ތަރައްޤީވުމަށް އެހީވެދެއެވެ. އެކެއް އަނެކެއްގެ ފަރާތުން ލިބޭ މައުލޫމާތާއި ތަމްރީނަކީ ކުރިއަށް ދިއުމުގެ ބާރެކެވެ. އެކުގައި މަސައްކަތްކުރާ ޓީމަށް ލިބޭ ކުރިއެރުމެކެވެ. އެކުގައި މަސައްކަތްކުރާ މީހުންގެ ފަރާތުން އާޚިޔާލުތަކާއި ތަޖުރިބާތަކެއް ހޯދައިގަނެވެއެވެ. އަދި އެކަކު އަނެކަކު ހަދާ ގޯސްތަކުން ވެސް އެތައް ފިލާވަޅެއް ލިބިގަނެވެއެވެ. އޭގެ ސަބަބުން މުސްތަގުބަލުގައި ކުރާ ކަންކަން ރަނގަޅުކުރުމަށް އެހީތެރިވެދެއެވެ.

އަހަރުމެން އެންމެންނަކީވެސް ތިމާގެ ކިބައިގައިހުރި އަޚްލާގީ ރަނގަޅު ސިފަތަކާއި ރަނގަޅަށް ކުރެވިދާނެ ކަންތައް މުޅިން އެނގޭ ބައެއް ނޫނެވެ. އެހެންނަމަވެސް އެކުގައި މަސައްކަތްކުރާ މީހުންގެ ފަރާތުން ލިބޭ ފާޑުކިޔުންތަކުގެ ސަބަބުން ތިމާއަށް އެފަދަ ކަންކަން ދެނެގަނެވެއެވެ. ތިމާގެ ކިބައިގައި ހުރި އުނި ސިފަތަކާއި ރަނގަޅު ކަންކަން ދެނެގަނެވޭވަރަކަށް ޓީމު މެމްބަރެއްގެ ގޮތުގައި ދެވޭ ޚިދުމަތް ރަނގަޅު ކުރެވޭނެއެވެ. އަދި ތިމާއަކީ އެހެންމީހުންގެ ކުރިމަތީގައި ރަނގަޅު މީހެއްގެ ގޮތުގައި ބަލައިގަތުން ބޮޑުވާނެއެވެ. ހަމައެއާއެކު އާއިލާގެ ގުޅުންތައް މާބޮޑަށްވެސް ރަނގަޅު ކުރެވޭނެއެވެ.

ޓީމެއްގެ ގޮތުގައި މަސައްކަތްކުރާއިރު މާޔޫސްވެގެން އުޅެންޖެހޭ މިންވަރު ކުޑަކޮށްދެއެވެ. އެކުގައި ގުޅިގެން މަސައްކަތްކުރާއިރު އެކަކު އަނެކަކަށް ޠަބަޢީ ގޮތުންނާއި ނަފްސާނީގޮތުން އެހީތެރިކަން ފޯރުވައިދެވެއެވެ. އެއީ ކޮންމެ މުވައްޒަފަކީވެސް ވެރިއަކަށް ހުންނަ މީހާގެ ފަރާތުން މަސައްކަތް އަވަސް ކުރުމަށާއި ނިންމުމަށް އެތައް ޑިމާންޑުތަކެއް ކުރިމަތިވާ މުވައްޒަފަކަށްވާތީ، ޚިޔާލުބަދަލުކޮށް މަޝްވަރާކޮށްލައިގެން ހިތަށް ތަސައްލީއެއް ހޯދޭނެތީއެވެ.

ވެރިއަކަށް ހުންނަ މީހަކީ ހަމައެކަނި މަސައްކަތް ކުރުވަން ހުންނަ މީހެއްގެ ގޮތުގައި ނުދެކޭށެވެ. އޭނާއަކީ މާޔޫސްކަމުން ތިމާ ނުކުތުމަށް އެހީތެރިވެދޭނެ މީހެއްގެ ގޮތުގައިވެސް ދެކޭށެވެ.

ޓީމެއްގެ ގޮތުގައި މަސައްކަތްކުރުމުން ރިސްކް ނެގުމަށް ފަސްޖެހުން ދުރުކޮށްދެއެވެ.  އެކަނި މަސައްކަތެއް ކުރާއިރު ކުރިމަތިވެދާނެ ނުރައްކަލަކަށް ނުވަތަ ގެއްލުމަކަށް މާބޮޑަށްވެސް ސަމާލުވެވެއެވެ. އެހެންނަމަވެސް ޓީމެއްގެ ގޮތުގައި މަސައްކަތްކުރާއިރު ކަމެއް ގޯސްކޮށް ކުރެވޭ ހާލަތުގައި އެހީތެރިވާނެ ބަޔަކު ތިބިކަމުގެ ޔަގީންކަން އަބަދުވެސް އޮންނާނެއެވެ.

ޓީމެއްގެ ގޮތުގައި މަސައްކަތްކުރުމުން ހެދޭ ގޯސްތައްވެސް މަދުވެއެވެ. ޓީމެއްގެ ގޮތުގައި މަސައްކަތްކުރާއިރު އެކަކު އަނެކަކަށް ހިތްވަރުދީ ހަދައެވެ. އޭގެ ސަބަބުން ޝައުގުވެރިކަމާއި ޖޯޝް އިތުރުވެއެވެ. ހަމައެއާއެކު އޮންނަ އެކުވެރިކަމުގެ ސަބަބުން އުފާވެރި މާހައުލެއްގައި ހާސްކަމެއްނެތި މަސައްކަތް ކުރަމުން ގެންދެވެއެވެ. ދިރާސާތަކުން އެނގޭގޮތުގައި މަސައްކަތުގައި އުޅޭއިރު ހާސްވެ ކަންބޮޑުވުން އިތުރުވުމުން ގިނަ ގޯސްތަކެއް ހެދެއެވެ.

ޖުމްލަކޮށް ބުނާނަމަ، ދިރާސާތަކުން ފެންނަންހުރި ހަގީގަތަކީ މުއައްސަސާ އެއްގައިވިއަސް އަދި ކުންފުންޏެއްކަމަށް ވިއަސް ގުޅިގެން ޓީމެއްގެ ގޮތުގައި މަސައްކަތް ކުރުމުން ނެރެވޭ ނަތީޖާ  މާރަނގަޅުކަމެވެ. އެހެންކަމުން ތަނުގެ ކުރިއެރުމަށާއި މުވައްޒަފުންގެ ގުޅުންތައް ދެމެހެއްޓުމަށްވެސް ގުޅިގެން މަސައްކަތް ކުރުމަށް މުވައްޒަފުންނަށް ހިތްވަރު ދޭންޖެހެއެވެ. އަދި މަސައްކަތްތައް ރޭވުމުގައިވެސް  “ޓީމް ވާރކް” ތަރައްގީ ކުރަންޖެހެއެވެ.

https://www.atlassian.com/blog/teamwork/the-importance-of-teamwork# މަޢުލޫމާތު: