މި އަހަރުގެ ލިޔަންކިޔަން ދަތުމުގެ ދުވަސް ފާހަގަ ކުރުމަށް ނެޝަނަލް އިންސްޓިޓިޔުޓް އޮފް އެޑިޔުކޭޝަން، (އެން.އައި.އީ) ގެ މުވައްޒަފުންގެ މެދުގައި ކުރިޔަށް ގެންދިޔަ މުބާރާތްތަކުގެ ނަތީޖާ ފާޅުކޮށް ވަނަވަނައަށް ދިޔަ ފަރާތްތަކަށް އިނާމާއި ހަނދާނީ ލިޔުން ދިނުމުގެ ޙަފުލާ މިއަދު ބާއްވައިފިއެވެ.
ކުރީ އަހަރުތަކާ ޚިލާފަށް މިއަހަރު މިޙަރަކާތްތައް ކުރިޔަށް ގެންދެވިފައިވަނީ އަހަރުގެ އެކި ދުވަސްތަކަށް ބަހާލައިގެން ސިލްސިލާކޮށެވެ.
މިގޮތުން ކުރިޔަށް ގެންދެވުނު މުބާރާތް ތަކުގެތެރޭގައި އަތުލިޔުމާއި، ކުށްބަސް ރަނގަޅު ކުރުމާއި، ރައިވަރުކިޔުން އަދި ވާހަކަ ހުށަހެޅުމާ، ކުއްލި މައުޟޫއަށް ވާހަކަދެއްކުމާ، އިޝާރާތް މުބާރާތް ހިމެނެއެވެ.
މި މުބާރާތްތަކުން ޚާއްޞަ ވަނަތައް ޙާޞިލުކުރެއްވި ބައިވެރިންނަކީ، އަތުލިޔުމުންނާއި އިޝާރާތް މުބާރާތުން 1ވަނަ ޢާއިޝަތު އަޒީފާ (އެން.އައި.އީ،) ރައިވަރު ކިއުމުން 1 ވަނަ އިބްރާހީމް ޙަސަން (މިނިސްޓްރީ އޮފް އެޑިޔުކޭޝަން) ކުށްބަސް ރަނގަޅު ކުރުމުން 1 ވަނަ ފަޒުނާ ޔޫސުފް ( އެން،އައި،އީ) ވާހަކަ ކިޔުމުން 1 ވަނަ ފާތިމަތު ޝާޒުލީ ( އެން،އައި،އީ) ކުއްލި މައުޟޫއަށް ވާހަކަ ދެއްކުމުން 1 ވަނަ ޢަލީ ރަޝީދު ( އެން،އައި،އީ) އެވެ.
މި ޙަރަކާތްތަކުގެ ނިމުން ފާހަގަ ކުރުމަށް އެން،އައި،އީ ސެމިނަރ ރޫމުގައި ބޭއްވި ޙަފުލާ ޝަރަފްވެރިކޮށްދެއްވައި ވަނަތައް ޙާޞިލު ކުރި ބައިވެރިންނަށް އިނާމާ ހަނދާނީ ލިޔުން ދެއްވީ މިނިސްޓަރ އޮފް ސްޓޭޓް ފޮރ އެޑިޔުކޭޝަން ޑޮކްޓަރ ޢަބްދުއްލަތީފް މުޙަންމަދެވެ. ޝަރަފްވެރި މެހެމާނުގެ އިތުރުން އިނާމާއި ހަނދާނީ ލިޔުން ދެއްވީ އެން،އައި،އީގެ އިސްވެރިޔާ، ޑެޕިއުޓީ މިނިސްޓަރ އޮފް އެޑިޔުކޭޝަން ޑޮކްޓަރ ޢައިޝަތު ނިޝާން އާއި ކޮންޓިނިއުއިންގ ކޮމިޔުނިޓީ އެޑިޔުކޭޝަން ޑިޕާރޓްމެންޓުގެ އިސްވެރިޔާ އަޙުމަދު ޒާހިރެވެ.
ޙަފުލާ ނިމިގެންދިޔައީ ދުވަހާ ގުޅޭ ޚާއްޞަ ލަވައަކުންނެވެ.
