“ހެލްތް ޕްރޮމޯޓިންގ ސްކޫލް ކޮންފަރެންސް” ނިންމުމުގެ ރަސްމިއްޔާތު މިއަދު މެންދުރުފަހު ބާއްވައިފިއެވެ. މި ރަސްމިއްޔާތު ޝަރަފުވެރިކޮށްދެއްވީ މިނިސްޓްރީ އޮފް ޖެންޑަރ، ފެމިލީ އެންޑް ސޯޝަލް ސަރވިސަސްގެ ސްޓޭޓް މިނިސްޓަރ މުޙައްމަދު ޝިހާބު އެވެ.
މި ކޮންފަރެންސްގައި ބައިވެރިވެފައިވަނީ މާލޭ ސަރަޙައްދުގެ 17 ސްކޫލަކުން މުވައްޒަފުންނާއި ދަރިވަރުން އަދި ބެލެނިވެރިން ހިމެނޭ ގޮތަށް ޖުމްލަ 136 ބައިވެރިންނެވެ. މީގެ އިތުރުން އަތޮޅުތަކުން ޖުމްލަ 79 ސްކޫލެއް އޮންލައިންކޮށް އޮބްޒާވަރުންގެ ގޮތުގައި ބައިވެރިވެފައިވެއެވެ.
މި ކޮންފަރެންސްގެ މައިގަނޑު މަޤުސަދަކީ ހެލްތް ޕްރޮމޯޓިންގ ސްކޫލް ޕޮލިސީ ތަންފީޒުކުރުމަށް ބާރުއެޅުމާއި، ކޮންފަރެންސްގައި ބައިވެރިވާ ސްކޫލުތަކުގައި ހެލްތް ޕްރޮމޯޓިންގ ސްކޫލުގެ ޑައިމެންޝަންތަކަށް ކޮށްފައިވާ މަސައްކަތްތައް ޙިއްޞާކޮށް،ސްކޫލުތަކުގެ މެދުގައި ތަޖުރިބާތައް ޙިއްޞާކުރުމެވެ.
މިބައްދަލުވުން ބޭއްވުނީ މިމަހުގެ 25 ން މިއަދާހަމަޔަށެވެ. ”ހެލްތް ޕްރޮމޯޓިންގ ސްކޫލް ކޮންފަރެންސް” ފެށުމުގެ ރަސްމިއްޔާތު ޝަރަފުވެރިކޮށްދެއްވީ ނައިބު ރައީސް ފައިޞަލް ނަސީމް އެވެ.
