ޓީޗް ޓޫލް ޓީ.އޯ.ޓީން (ޓްރެއިނިންގ އޮފް ޓްރެއިނަރސް) ތަމްރީން ކުރުމަށް ކުރިޔަށް ގެންދާ ޚާއްޞަ މަސައްކަތު ބައްދަލުވުން ފެށިގެން ކުރިޔަށް އެބަދެއެވެ.
އަހުމަދިއްޔާ އިންޓަރނޭޝަނަލް ސްކޫލްގެ ކޮމްޕިއުޓަރ ލެބްގައި ކުރިޔަށްދާ ޓީ.އޯ.ޓީން ތަމްރީންކުރުން ރަސްމީ ކޮށް ފައްޓަވައިދެއްވީ ނެޝަނަލް އިންސްޓިޓިޔުޓް ހިންގުމާ ހަވާލުވެ ހުންނެވި މިނިސްޓަރ އޮފް އެޑިޔުކޭޝަންގެ ނައިބު، ޑޮކްޓަރ ފާޠިމަތު ނިޝާން އެވެ.
މި މަސައްކަތު ބައްދަލުވުމުގެ މައިގަނޑު މަގްސަދަކީ، ޓީޗް ޓޫލް ބޭނުންކޮށްގެން ކިޔަވައިދިނުން ހަރުދަނާކުރުމާއި ކިޔަވައިދިނުން މޮނިޓަރ ކޮށް ބަލަހައްޓާނެ ގޮތްތަކަށް މުދައްރިސުން އަހުލުވެރި ކުރުމަށް ރާއްޖޭގެ އެކި ކަންކޮޅުތަކުގައި ޙަރަކާތްތެރިވާނެ ޓީ.އޯ.ޓީން ތަމްރީން ކުރުމެވެ.
އެން.އައި.އީ އާއި ކިއު.އޭ.ޑީ އަދި ޑީ.އޯ.އައި. ގެ ފަންނީ މުވައްޒަފުންގެ ތެރެއިން 25 ބޭފުޅުން ބައިވެރިކޮށްގެން ކުރިޔަށް ގެންދާ މި ތަމްރީންތަކުގެ ބައިވެރިންނަށް މަޢުލޫމާތު ދެއްވަނީ، ވޯލްޑް ބޭންކުން ޓީޗް ޓޫލް ޑިވެލޮޕް ކުރުމަށް އެކުލަވާލި ޓްރޭނިންގ ޓީމުގެ މެންބަރެއްކަމުގައިވާ މިސްޓަރ އަބްރަލްމުފްތީ އެވެ.
ނޮވެމްބަރު 4 އިން 7 އަށް ކުރިޔަށްދާ މި ތަމްރީންތަކަކީ، މޯލްޑިވްސް އެޓޯލް އެޑިއުކޭޝަން ޑިވެލޮޕްމަންޓް ޕްރޮޖެކްޓް (އޭ.އީ.ޑީ.ޕީ ) ދަށުން ހިންގާ ތަމްރީންތަކެކެވެ.
